జన్ ధన్ ఖాతాల్లో ఎంత డబ్బు ఉందో తెలుసా?

దేశవ్యాప్తంగా ప్రధానమంత్రి జన్ ధన్ యోజన (PMJDY) కింద తెరిచిన బ్యాంకు ఖాతాల్లో మొత్తం డిపాజిట్లు రూ.2.75 లక్షల కోట్లు దాటాయని ఆర్థిక సేవల విభాగం కార్యదర్శి ఎం. నాగరాజు వెల్లడించారు. దీని ప్రకారం, ప్రతి జన్ ధన్ ఖాతాలో సగటున రూ.4,815 చొప్పున నిల్వలు ఉన్నాయని ఆయన తెలిపారు. శనివారం హైదరాబాద్‌లోని అడ్మినిస్ట్రేటివ్ స్టాఫ్ కాలేజ్ ఆఫ్ ఇండియాలో జరిగిన ఒక కార్యక్రమంలో ఆయన ఈ వివరాలను పంచుకున్నారు.

2014లో ప్రారంభమైన ఈ పథకం ద్వారా ఇప్పటివరకు దాదాపు 57 కోట్ల మంది పౌరులు బ్యాంకింగ్ వ్యవస్థలోకి అడుగుపెట్టారని నాగరాజు గుర్తుచేశారు. దేశంలో ఆర్థిక సమ్మిళితత్వ ప్రయాణాన్ని 'అద్భుతం'గా అభివర్ణించిన ఆయన, ఈ విజయంలో జన్ ధన్ యోజన కీలక పాత్ర పోషించిందని అన్నారు. మొత్తం ఖాతాల్లో 78.2 శాతం గ్రామీణ, పట్టణ ప్రాంతాల్లోనే ఉండగా, ఖాతాదారుల్లో సరిగ్గా సగం మంది (50 శాతం) మహిళలే ఉన్నారని వివరించారు.

ఈ ఆర్థిక సంవత్సరం మొదటి త్రైమాసికంలోనే ప్రత్యక్ష నగదు బదిలీ (DBT) ద్వారా వివిధ ప్రభుత్వ సంక్షేమ పథకాల కింద రూ.3.67 లక్షల కోట్లను నేరుగా లబ్ధిదారుల ఖాతాలకు జమ చేసినట్లు నాగరాజు వివరించారు. ఈ పథకం ద్వారా ప్రభుత్వ సబ్సిడీలు, పెన్షన్లు ఎలాంటి మధ్యవర్తులు లేకుండా పేదలకు చేరుతున్నాయని, ఇది దేశ ఆర్థిక వ్యవస్థను బలోపేతం చేయడానికి దోహదపడుతోందని ఆయన అభిప్రాయపడ్డారు.